Урматтуу эжелер жана карындаштар! 

Сиздерди чын жүрөгүмдөн 8-Март – Эл аралык аялдар күнү менен куттуктайм!

«Ааламды аял терметет» демекчи, баарыбызды жарык дүйнөгө алып келген ыйык Энелерибизге алгачкы алкышыбызды билдирели.

Бул күн — жаздын, сулуулуктун гана майрамы эмес, ошондой эле аялдардын коомубуздун жана өлкөбүздүн өнүгүүсүнө кошкон зор салымын таануунун күнү. Баарыбызга маалым болгондой, аялдар — үй-бүлөдө, эмгек жамааттарында, илимде, саясатта, билим берүүдө жана бизнесте прогрессти алдыга сүрөгөн эң маанилүү күч.

Кыргызстандагы аялдардын коомдук жана саясий турмушка кошкон ролуна өзгөчө токтолгум келет. Өлкөбүздө аялдар чечим кабыл алуу процесстерине активдүү катышып, жогорку кызматтарды аркалап, мамлекетибиздин өнүгүшүнө татыктуу салым кошуп жатышканы сыймык жаратат.

Элибизде аялзатына арналган даанышман сөздөр арбын. «Бейиш энелердин таман алдында» деген улуу накыл сөз эненин ордун, кадыр-баркын жана ыйыктыгын өзгөчө даңазалайт. Бул осуят аял затынын коомдогу, үй-бүлөдөгү жана адам тарбиясындагы ордун эң жогорку даражага көтөрөт.

Чынында эле, эне — мээримдин булагы, тарбиянын башаты, ыймандуулуктун тиреги. Аялзатынын акылмандыгы, сабырдуулугу жана кайраты менен үй-бүлө бекемделип, коом өнүгөт.

Бүгүнкү күндө аялдар маданият, билим берүү, саламаттык сактоо, искусство, илим, саясат, жаңы технологиялар, спорт жана ишкердик тармактарында зор ийгиликтерди жаратып жатышат. Дүйнөлүк ареналарда балбан кыздарыбыздын катары жыл сайын толукталып, өлкөбүздүн намысын татыктуу коргоп келүүдө.

Сиздердин эмгегиңиздер, сабырдуулугуңуздар, камкордугуңуздар жана акылмандыгыңыздар үчүн чын жүрөктөн ыраазычылык билдирем. Жашооңуздар ар дайым бактылуу, кубанычтуу жана сүйүүгө бөлөнгөн болсун. Ар дайым урмат-сыйга ээ болуп, бекем ден соолукта, узак өмүр сүрүп, жаңы жетишкендиктерди багынта беришиңиздерди каалайм!

Майрамыңыздар кут болсун! 

Урматым менен, министр К.Л. Сагынбаев