Урматтуу балдар, ата-энелер жана өсүп келе жаткан муундун келечеги үчүн эмгектенип жаткан жалпы жарандар!

Сиздерди 1-июнь – Балдарды коргоонун эл аралык күнү менен чын жүрөктөн куттуктайм!

Бул майрам ар бир бала бактылуу балалыкка, коопсуз жашоого, сапаттуу билим алууга жана өз мүмкүнчүлүктөрүн толук ишке ашырууга укуктуу экенин дагы бир жолу эске салат.

Балдар – биздин келечегибиз, үмүтүбүз жана эң кымбат байлыгыбыз. Алардын укуктарын коргоо, ден соолугун чыңдоо, татыктуу тарбия жана билим алуусу үчүн шарт түзүү мамлекеттин, үй-бүлөнүн жана коомдун биргелешкен милдети болуп саналат. Ар бир бала сүйүү, камкордук, түшүнүү жана урмат-сый чөйрөсүндө өсүп-жетилүүгө тийиш.

Кыргыз Республикасынын Эмгек, социалдык камсыздоо жана миграция министрлиги балдардын укуктарын жана мыйзамдуу кызыкчылыктарын коргоо, алардын ар тараптуу өнүгүүсү үчүн жагымдуу шарттарды түзүү багытында ырааттуу иштерди жүргүзүп келет. Балдардын бакубат жашоосун камсыздоо, үй-бүлө институтун чыңдоо жана ар бир баланын коопсуз чөйрөдө өсүүсүнө көмөк көрсөтүү мамлекеттин социалдык саясатынын негизги артыкчылыктарынын бири болуп саналат. Бул багыттагы иштер мындан ары да улантылып, ар бир баланын толук кандуу өнүгүүсүнө шарт түзүүгө өзгөчө көңүл бурулат.

Балдардын жаркын келечеги, бактылуу балалыгы жана бакубат жашоосу үчүн көрүлүп жаткан аракеттер мындан ары да үзгүлтүксүз улантыларына терең ишенем.

Бул майрам күнү бардык балдарга бекем ден соолук, кубанычтуу маанай, жаркын келечек, окууда жана чыгармачылыкта ийгиликтерди, ошондой эле бардык тилектеринин орундалышын каалайм. Балдардын жүзүнөн жылмаюу кетпей, ар дайым ата-энесинин жана жакындарынын мээримине бөлөнүп жүрүшсүн.

Балдардын укуктарын жана кызыкчылыктарын коргоо багытында талыкпай эмгектенип жаткан ата-энелерге, мугалимдерге, социалдык кызматкерлерге жана бардык адистерге терең ыраазычылык билдирем.

Ар бир баланын балалыгы бактылуу, коопсуз жана жаркын мүмкүнчүлүктөргө бай болсун!

Терең урматтоо менен,
Министр К.Л. Сагынбаев.